ഞാനേറെ ആദരിക്കുന്ന ഇന്ത്യന്‍ നവസിനിമാ സംവിധായകരില്‍ ഒരാളാണ് ശ്യാം ബനഗല്‍. പ്രകടനപരതയില്ലാത്ത, പ്രിറ്റന്‍ഷ്യസ് അല്ലാത്ത സിനിമകള്‍ സംവിധാനം ചെയ്ത പ്രതിഭാധനന്‍. ശബാന ആസ്മി, സ്മിത പാട്ടില്‍, ദീപ്തി നാവല്‍,നസീറുദ്ദീന്‍ ഷാ, ഓം പുരി, ഗോവിന്ദ് നിഹ് ലാനി, ഗിരീഷ് കര്‍ണാട്, അനന്ത് നാഗ് തുടങ്ങിയ പ്രതിഭകളെ ഏറ്റവും നന്നായി വിനിയോഗിച്ച ചലച്ചിത്രകാരന്‍. സൂര്യ ഫിലിം സൊസൈറ്റി അങ്കുര്‍ പ്രദര്‍ശിപ്പിച്ചതിനോടനുബന്ധിച്ചാണെന്നു തോന്നുന്നു അദ്ദേഹത്തെ കൊണ്ടുവരികയും സിനിമയ്ക്കു ശേഷം ഒരു സംവാദത്തിനവസരമൊരുക്കുകയും ചെയ്തപ്പോള്‍ ടാഗോര്‍ തീയറ്ററില്‍ വച്ചാണദ്ദേഹത്തെ ആദ്യമായി നേരില്‍ക്കാണുന്നത്. പിന്നീട് വിവിധ ചലച്ചിത്രമേളകളിലും ചടങ്ങുകളിലും ദൂരെ നിന്നു കണ്ടു. ഒന്നു രണ്ടു വാചകം സംസാരിച്ചു. പക്ഷേ വ്യക്തിഗതമായി മറക്കാനാവാത്ത അനുഭവമൊരുക്കിയത് ചിന്ത പബ്‌ളീഷേഴ്‌സാണ്.ശ്രീ ശിവകുമാര്‍ ജനറല്‍ മാനേജറായിരുന്ന കാലത്ത് 2016ലാണ് കേരള രാജ്യാന്തര ചലച്ചിത്രമേളയ്ക്കു മുന്നോടിയായി നവതിയാഘോഷിക്കുന്ന മലയാള സിനിമയെപ്പറ്റി കേരള ടാക്കീസ് എന്ന പേരില്‍ ഇംഗ്‌ളീഷില്‍ ഒരു പഠനസമാഹാരം ആസൂത്രണം ചെയ്തു. ഞാനും സുഹൃത്തായ ഗിരീഷ് ബാലകൃഷ്ണനുമായിരുന്നു സമാഹര്‍ത്താക്കള്‍. ആ സമാഹാരം ചലച്ചിത്രമേളയിലെ ഓപ്പണ്‍ ഫോറത്തില്‍ വച്ച് ശ്രീ അടൂര്‍ സാര്‍ ശ്യാം ബനഗലിനു നല്‍കിയാണ് പ്രകാശിപ്പിച്ചത്. അതൊരു മായാസ്മരണയായി ഇന്നും മനസില്‍ നില്‍ക്കുന്നു. ഇത്തരം ചില നിമിഷങ്ങളാണ് ഇത്രയും കാലം സിനിമയെപ്പറ്റി എഴുതിയതിന് ലഭിക്കുന്ന ഏറ്റവും വലിയ അംഗീകാരവും ഭാഗ്യവുമായി കരുതുന്നത്. പ്രിയസംവിധായകന്റെ ദീപ്തസ്മൃതികള്‍ക്കു മുന്നില്‍ ആദരാഞ്ജലി
No comments:
Post a Comment