BOOK TALK KERALA in media

 

മാധ്യപഠനകേന്ദ്രം ബുക് ടോക്ക് പരമ്പര ഉദ്ഘാടനവും ആദരസന്ധ്യയും

 

വലിയ വലിയ കാര്യങ്ങളാണ് ഇന്നലെ മാധ്യമ പഠന കേന്ദ്രം ട്രസ്റ്റ് തിരുവനന്തപുരം പ്രസ്ക്ലബിൽ സംഘടിപ്പിച്ച ബുക്ക് ടാക്ക് പുസ്തക പഠന ചർച്ചയിലും തുടർന്നു നടന്ന ആദരസന്ധ്യയിലും പങ്കെടുത്ത ഗുരുതുല്യരും സഹോദര സമാനരുമായ പ്രഭൃതികൾ സംസാരിച്ചത്. മുൻ ചീഫ് സെക്രട്ടറിയും ഇംഗ്ലീഷ് എഴുത്തുകാരിയുമായ ശാരദ മുരളീധരൻ, മുൻ ഡിജിപിയും ആഭ്യന്തര വകുപ്പ് ഉപദേഷ്ടാവുമായ ഹേമചന്ദ്രൻ, PSC അംഗം ഡോ. ഷാജിബ്, ജ്യേഷ്ഠ തുല്യനായ മുതിർന്ന മാധ്യമ പ്രവർത്തകൻ എം ജി രാധാകൃഷ്ണൻ, ഗുരുതുല്യനായ ചലച്ചിത്ര നിരൂപകൻ വിജയകൃഷ്ണൻ, വാസ്തുശിൽപി ഡോ ജി ശങ്കർ. ജ്യേഷ്ഠ തുല്യനായ മുതിർന്ന മാധ്യമ പ്രവർത്തകൻ ബൈജു ചന്ദ്രൻ, ഗുരുതുല്യനായ ചലച്ചിത്ര പ്രവർത്തകനും IIFK മുൻ ഡയറക്ടറുമായ എ മീർസാഹിബ് എന്നിവരെക്കെ സംസാരിച്ചത് എൻ്റെ പോസ്റ്റ് ട്രൂത്ത് സിനിമയെ പറ്റിയും എന്നെപ്പറ്റിയും ആണ് എന്നത് സദസിൽ ഒരാളായിരുന്നു കേൾക്കുന്നതിലെ അദ്‌ഭുതമാണ് ഈ സന്ധ്യ എനിക്ക് നൽകിയത്. എൻ്റെ ഒരു പുസ്തകം പൊതുസമക്ഷം ഇത്രയും ഗൗരവത്തോടെ ചർച്ച ചെയ്യപ്പെടുന്നു എന്നതിലാണ് എനിക്കേറ്റവും സന്തോഷം. എന്നെ പറ്റി പ്രിയപ്പെട്ടവർ നല്ല വാക്കുകൾ പറഞ്ഞത് വാത്സല്യം കൊണ്ടാണ്. പക്ഷേ പുസ്തകത്തെ പറ്റി ഉത്തരവാദിത്തപ്പെട്ടവർ ആധികാരികമായി വിലയിരുത്തിയത് അതിനു കിട്ടിയ അംഗീകാരമാണ്. എഴുതിയ ആളെന്ന നിലയ്ക്ക് എന്നെ സംബന്ധിച്ച് അതൊരു വലിയ, പ്രധാനപ്പെട്ട കാര്യം തന്നെയാണ്. പരിമിതികളോടെയെങ്കിലും ഇങ്ങനൊരു വേദി എനിക്കും പുസ്തകത്തിനും മാത്രമായി സംഘടിപ്പിച്ച പ്രിയപ്പെട്ട ഡോ. ഷിറാസ് ഖാനും ഗുരു എം.എഫ് തോമസ് സാറിനും എനിക്കു വേണ്ടി മാത്രം വന്നു പങ്കെടുത്ത സുഹൃത്തുക്കൾക്കും ബന്ധുജനങ്ങൾക്കും നന്ദി നന്ദി മാത്രം!

Chandrasekhar Chairman 72nd National Film Awards for the Best writing in Cinema 2026 announcing the awards

https://www.youtube.com/watch?v=9NUudToxxvc 

https://www.pib.gov.in/PressReleasePage.aspx?PRID=2286143&reg=48&lang=1

സത്യാനന്തര പ്രവണതയുടെ പഠനം: 'പോസ്റ്റ് ട്രൂത്ത് സിനിമ'

പുതിയ സമകാലിക മലയാളം വാരികയില്‍, എന്റെ പോസ്റ്റ് ട്രൂത്ത് സിനിമ എന്ന പുസ്തകത്തെ വിലയിരുത്തി, മലയാള മനോരമയിലെ ഗുരുതുല്യനായ മുതിര്‍ന്ന മുന്‍ സഹപ്രവര്‍ത്തകനും, ഗള്‍ഫ് ടുഡേയിലെ മുന്‍ പൊളിറ്റിക്കല്‍ എഡിറ്ററുമായിരുന്ന ശ്രീ പി പി മാത്യു സര്‍ എഴുതിയ നിരൂപണം പ്രസിദ്ധീകരിക്കപ്പെട്ടിട്ടുണ്ട്. വലിയ സന്തോഷം. 

പി പി മാത്യു 

അഗാധമായ ഗവേഷണവും അതിസൂക്ഷ്മമായ വിശകലനവും കൊണ്ടു ശ്രദ്ധേയമാവുന്ന 'പോസ്റ്റ് ട്രൂത്ത് സിനിമ' എന്ന പുസ്തകം പേരു കൊണ്ടു ചലച്ചിത്ര അവലോകനമാണെന്ന തോന്നൽ ഉളവാക്കാമെങ്കിലും അതിനപ്പുറം ഈ കാലഘട്ടത്തിൽ ഏറെ പ്രസക്തമാവുന്ന അപകടകരമായ സാമൂഹ്യ-രാഷ്ട്രീയ പ്രവണതകളുടെ നിരീക്ഷണം  കൂടിയാണ്. മൂന്നു പതിറ്റാണ്ട് മാധ്യമപ്രവർത്തകനായി അനുഭവ സമ്പത്തു നേടിയ എ. ചന്ദ്രശേഖർ പുരസ്‌കാരങ്ങൾ ഏറ്റുവാങ്ങിയിട്ടുള്ളവ ഉൾപ്പെടെ 21 കൃതികൾക്കു ശേഷം എഴുതിയ ഈ പുസ്തകത്തിലെ അന്വേഷണം സാധാരണ മനുഷ്യരുടെ ജീവിതങ്ങളെയും ലോകഗതിയെയും പോലും നിശബ്ദമായി ബാധിക്കുന്ന സമകാലീന പ്രവണതയെ കുറിച്ചാണ്: പോസ്റ്റ് ട്രൂത്ത് അഥവാ സത്യാനന്തരം/വാസ്തവാനന്തരം.

"മനഃപൂർവം സൃഷ്ടിച്ചു പ്രചരിപ്പിക്കുന്ന അസത്യപരമായ സ്രോതസുകളില്ലാത്ത പ്രചാരണാത്മക വിനിമയങ്ങളാണ് സത്യാനന്തര കാലത്തെ പ്രത്യേകത. സത്യം കച്ചവടം ചെയ്യപ്പെടുന്ന അവസ്ഥയാണ് പോസ്റ്റ് ട്രൂത്ത്," ഇൻസ്റ്റിറ്റ്യൂട്ട് ഓഫ് മാസ് കമ്മ്യൂണിക്കേഷനിൽ അസിസ്റ്റന്റ് പ്രഫസർ കൂടി ആയിരുന്ന ചന്ദ്രശേഖർ അത് വിശദീകരിക്കുന്നു. 1992ലെ ഗൾഫ് യുദ്ധകാലത്തു പ്രചാരം നേടിയ ഈ വിശേഷണം, സ്വാർത്ഥലക്‌ഷ്യം നേടാൻ ഏതു വലിയ കള്ളവും സത്യമാണ് എന്ന മട്ടിൽ യാതൊരു മടിയും കൂടാതെ ജനത്തിനു വിൽക്കുകയാണ് എന്നദ്ദേഹം എടുത്തു കാട്ടുന്നു.   

സാഹിത്യത്തിലും സമൂഹത്തിലും സിനിമയിലും ഈ പ്രവണതയ്ക്ക് ഉണ്ടായിട്ടുള്ള സ്വാധീനമാണ് ചന്ദ്രശേഖർ വിലയിരുത്തുന്നത്. സത്യം മരിച്ചു അഥവാ അപ്രസക്തമായി എന്ന നിഗമനത്തെക്കാൾ കടന്ന്, ഈ കേൾക്കുന്ന നുണകളൊക്കെ സത്യമാണെന്നു സമ്മതിക്കാൻ നമ്മളെന്താ മടിക്കുന്നത് എന്ന ചോദ്യം ഉയരുന്ന കാലമായി എന്നാണ് നിരീക്ഷണം. "വസ്തുതാ പ്രചാരണത്തിന്റെ നിയമവ്യവസ്ഥകൾ തന്നെ തകിടം മറിക്കപ്പെടുന്നു. പകരം സത്യം കച്ചവടം ചെയ്യപ്പെടുന്നു. അതാണ് പോസ്റ്റ് ട്രൂത്ത് ദുരവസ്ഥ." 

സത്യത്തെ മുറുകെപ്പിടിച്ചിരുന്ന സ്ഥാപനങ്ങൾ തകർക്കപ്പെട്ട് അപ്രസക്തമായി തീർന്ന കാലഘട്ടത്തിലാണ് പോസ്റ്റ് ട്രൂത്ത് പിടിമുറുക്കിയത്. എന്നാൽ സത്യത്തിനു ശേഷം എന്ന അർത്ഥം അതിനില്ല. ശാസ്ത്രത്തെ മുൻനിർത്തി അശാസ്ത്രീയ കാര്യങ്ങൾ പ്രചരിപ്പിക്കുന്ന ആയുധവുമാണത്. ലോകത്തിനു മേൽ ഏറെ സമമർദം ചെലുത്തുകയും അടക്കി വാഴാൻ ശ്രമിക്കയും ചെയ്യുന്ന ഡോണൾഡ്‌ ട്രംപ് തന്നെ ഏറ്റവും വലിയ സമകാലീന ഉദാഹരണം. 

നിഷ്കളങ്കമായി സംഭവിക്കുന്ന തെറ്റുകളോ ബോധപൂർവം പ്രശ്നം സൃഷ്ടിക്കാൻ പടച്ചു വിടുന്ന വാർത്തകളോ അല്ല സത്യാനന്തരം. അതിനൊക്കെ അപ്പുറമാണ്. എ ഐ സാങ്കേതിക വിപ്ലവത്തോടെ അത് അപകടകരമായ മാനങ്ങൾ കൈവരിച്ചു.  

സത്യം അനുഭവത്തിലാണ് ചിന്തയിലല്ല തിരിച്ചറിയുന്നത് എന്ന സ്റ്റാൻലി കുബ്രിക്കിന്റെ ഉദ്ധരണിയോടെ ആരംഭിക്കുന്ന മൂന്നാം അധ്യായത്തിലാണ് ഗ്രന്ഥകാരൻ തനിക്കു ഏറെ പരിചിതമായ ചലച്ചിത്ര മേഖലയെ സത്യാനന്തര കാലഘട്ടത്തിന്റെ പശ്ചാത്തലത്തിൽ വിലയിരുത്തുന്നത്. കേവലം പ്രചാരണത്തിനു വേണ്ടി നിർമിച്ച വിവാദ ചിത്രം 'ദ കേരള സ്റ്റോറി'യാണ് ആദ്യ വിശകലനം നേരിടുന്നത്. എത്ര അയഥാർഥവും അസത്യം നിറഞ്ഞതുമാണ് ആ ചിത്രത്തിന്റെ ഉള്ളടക്കമെന്നത് ഏറെ ചർച്ച ചെയ്യപ്പെട്ടു കഴിഞ്ഞതാണല്ലോ. "എന്നാൽ മാധ്യമപരമായി ആ സിനിമയുടെ യഥാർഥ പ്രശ്നം അതല്ല," ചന്ദ്രശേഖർ പറയുന്നു. "ഹിന്ദിയിൽ ആവിഷ്കരിക്കുന്ന സിനിമ കേരളത്തെയും മലയാളി നിത്യജീവിതത്തെയും തന്നെ അബദ്ധജടിലമായി ദൃശ്യവത്കരിക്കുക വഴിയാണ് അർദ്ധസത്യം പോലും അല്ലാതായത്." 

എന്നും തൂശനിലയിട്ടു പായസം അടക്കമുള്ള വിഭവങ്ങൾ കഴിക്കുന്ന നിത്യജീവിതമാണ് കേരള ഭവനങ്ങളിൽ കാണുന്നത് എന്നാണ് ചിത്രീകരിച്ചിട്ടുള്ളത് എന്നു ചൂണ്ടിക്കാട്ടി, അതിനൊന്നും സത്യത്തോട് പുലബന്ധം പോലുമില്ലെന്ന് ഗ്രന്ഥകാരൻ സ്ഥാപിക്കുന്നു. എന്നാൽ പ്രദർശന വിജയം നൽകുന്ന സൂചന എന്താണ്? ഇതേ നിർമാതാക്കൾ നക്‌സൽ പ്രസ്ഥാനം വിഷയമാക്കി എടുത്ത 'ബസ്തർ ദ നക്‌സൽ' എന്ന ചിത്രവും അവിശ്വസനീയം ആയിരുന്നെങ്കിലും ജനം അത് സ്വീകരിച്ചു എന്നു ചൂണ്ടിക്കാട്ടുന്ന ചന്ദ്രശേഖർ സ്ഥാപിക്കാൻ ശ്രമിക്കുന്നത് 'ഇതൊക്കെ സത്യമല്ലേ' എന്നു ചിന്തിച്ചു പോകുന്ന പോസ്റ്റ് ട്രൂത്ത് സവിശേഷതയാണ്. 

വിവേക് അഗ്നിഹോത്രിയുടെ 'കശ്മീർ ഫയൽസ്,' രഥീനയുടെ 'പുഴു,' സോഹൻ സീനുലാലിന്റെ 'ഭാരത് സർക്കസ്' തുടങ്ങിയ ചിത്രങ്ങളിലും സമാന പ്രവണതകൾ അദ്ദേഹം ചൂണ്ടിക്കാട്ടുന്നു.  

ദുരഭിമാനക്കൊല കേരളത്തിലും നടക്കുന്നു എന്നു പ്രഖ്യാപിക്കാൻ ശ്രമിക്കുന്ന ചിത്രങ്ങളും അവാസ്തവമായി ചന്ദ്രശേഖർ പ്രഖ്യാപിക്കുന്നു. അവയും ഉൾക്കൊള്ളുന്നത് അസത്യം വിൽക്കാൻ ഉളുപ്പൊന്നും വേണ്ട എന്ന സമീപനം തന്നെ. അതേ സമയം, ജാതി രാഷ്ട്രീയം പോലുള്ള വിഷയങ്ങളാണ് കൂടുതൽ അപകടകരമെന്നു അദ്ദേഹം വ്യക്തമാക്കുന്നു. ദളിത് രാഷ്ട്രീയം ഉൾക്കൊള്ളുന്ന  ചിത്രങ്ങളാണ് ഈ പഠനത്തിൽ മറ്റൊരു വിഷയം. കാടു പൂക്കുന്ന നേരം, നായാട്ട് എന്നിങ്ങനെയുള്ള ചിത്രങ്ങളാണ് പഠന വിഷയമായത്.

 

മലയാളത്തിലെ നവീന സിനിമകളിൽ പ്രാദേശിക ഭാഷയുടെ റിയലിസ്റ്റിക് ഉപയോഗം സ്വീകാര്യമായൊരു ഘടകമാണ് എന്ന വിലയിരുത്തലും ഇതിന്റെ ഭാഗമായുണ്ട്. കാസർഗോഡ് ഭാഷ ഉപയോഗിക്കുന്ന 'ന്നാ താൻ കൊട് കേസ്' ഉദാഹരണം. 'ഗോഡ്‌ഫാദറി'ൽ അഞ്ഞൂറാന്റെ നാലു മക്കൾ നാലു ഭാഷാഭേദങ്ങളിൽ സംസാരിക്കുന്ന അസംബന്ധം വിഷയമാക്കാതെ വിട്ട പ്രേക്ഷകർ ഈ മാറ്റത്തെ ഉൾക്കൊള്ളുന്നുവെന്നു ഈ ചിത്രങ്ങൾക്കു ലഭിച്ച സ്വീകാര്യത തെളിയിക്കുന്നുണ്ട്. എന്നാൽ അതിന്റെ ഭാഗമായി കടന്നു വന്ന അശ്‌ളീല പ്രയോഗങ്ങൾ 'പോസ്റ്റ് ട്രൂത്ത്' പ്രവണതയുടെ ഭാഗമാണെന്നും ഗ്രന്ഥകാരൻ കാണുന്നു. പ്രഗത്ഭനായ ലിജോ ജോസ് പെല്ലിശ്ശേരിയുടെ 'ചുരുളി' ആണ് ഇക്കാര്യത്തിൽ അനിവാര്യമായി ചൂണ്ടിക്കാട്ടുന്ന ഒരു ചിത്രം. 

സിനിമയിൽ ഫ്രെയ്മിൽ കാണുന്നതു പോലെ കാണാൻ പാടില്ലാത്തതും പ്രസക്തമാണ് എന്ന മാർട്ടിൻ സോർസയെയുടെ ഉദ്ധരണിയാണ് 'കറുത്ത സത്യത്തിന്റെ ഉൾപ്പൊരുളുകൾ' എന്ന അഞ്ചാം അധ്യായത്തിൽ ചേർത്തിട്ടുള്ളത്. സിനിമയുടെ ഡാർക്ക് മോഡാണ് ചന്ദ്രശേഖർ ചർച്ച ചെയ്യുന്നത്. ലോകേഷ്  കനകരാജ് ചിത്രങ്ങൾ പോലെ അതിഭീകരമായ വയലൻസ് ഈ ചർച്ചയിലേക്കു കടന്നു വരുന്നത് സ്വാഭാവികം. അക്രമം കണ്ടു അറപ്പുളവാകുന്ന തലത്തിലേക്കു എത്തിയിട്ടും ഈ പ്രവണത തുടരുകയും പ്രേക്ഷകർ അത് സ്വീകരിക്കുകയും ചെയ്യുന്നു എന്നതാണ് ശ്രദ്ധിക്കേണ്ടത്. 

"കാല്പനികതയെയും അതീന്ദ്രിയതയെയുമൊക്കെ മറികടന്നു മനുഷ്യന്റെ ജന്തുസഹജമായ ചോദനകളോടു പരമാവധി നീതി പുലർത്തിക്കൊണ്ടുള്ള അതീതയഥാതഥ നിർവഹണങ്ങൾക്കാണ് ലോക സാഹിത്യത്തിലും സിനിമയടക്കമുള്ള കലാരൂപങ്ങളിലും ഇപ്പോൾ വേരോട്ടം," ചന്ദ്രശേഖർ പറയുന്നു. വിജയ് ദേവരകൊണ്ട നായകനായ 'അർജുൻ റെഡ്‌ഡി,' രൺബീർ കപൂറിന്റെ 'ആനിമൽ,' നാഗേഷ് ഭട്ടിന്റെ 'കിൽ' എന്നിവയാണ് ഇന്ത്യൻ സിനിമയിൽ വലിയ സ്വീകാര്യത ലഭിച്ച ചില ഉദാഹരണങ്ങൾ.   

മദ്യവും ലഹരിയും നിറഞ്ഞാഘോഷമാവുന്ന സമൂഹത്തിന്റെ പ്രതിഫലനമാവുന്ന പല ചിത്രങ്ങൾക്കും പോസ്റ്റ് ട്രൂത്ത് വിഭാഗത്തിൽ പ്രസക്തി കണ്ടെത്തുന്ന അന്വേഷണം പുസ്തകത്തിൽ കാണാം. സാധാരണമായി കഴിഞ്ഞ യഥാതഥ പ്രവണതയും ചന്ദ്രശേഖർ ചർച്ച ചെയ്യുന്നുണ്ട് ഈ പശ്ചാത്തലത്തിൽ.  

സലിം കുമാര്‍ : ചിരിക്കപ്പുറം ജീവിതം

 Chalachitra Sameeksha June 2026

എ.ചന്ദ്രശേഖര്‍

മലയാള സിനിമയുടെ ചരിത്രത്തില്‍ ചില കലാകാരന്മാര്‍ അവരുടെ അഭിനയപ്രതിഭകൊണ്ട് മാത്രമല്ല, അവര്‍ പ്രതിനിധാനം ചെയ്ത സാംസ്‌കാരിക അനുഭവങ്ങളാലും കാലഘട്ടത്തിന്റെ അടയാളങ്ങളായി മാറിയിട്ടുണ്ട്. അത്തരത്തിലുള്ള അപൂര്‍വ പ്രതിഭകളില്‍ ഒരാളായിരുന്നു നടനും സംവിധായകനുമായ സലിം കുമാര്‍. മിമിക്രി വേദികളില്‍ നിന്ന് സിനിമയിലേക്കെത്തി, ഹാസ്യനടന്‍ എന്ന വാര്‍പ്പുമാതൃകയിലേക്കു കള്ളിചേര്‍ക്കപ്പെട്ടിട്ടും അതിനെ പ്രതിഭയുടെ ഊറ്റം കൊണ്ടു മറികടന്ന് ദേശീയ പുരസ്‌കാര ജേതാവായി, കഥാകൃത്തായി, സംവിധായകനായി, സാമൂഹിക നിരീക്ഷകനായി വളര്‍ന്ന അദ്ദേഹത്തിന്റെ ജീവിതം മലയാള ജനപ്രിയ സംസ്‌കാരത്തിന്റെ തന്നെ നേരധ്യായമാണ്.

സലിം കുമാര്‍ എന്ന വ്യക്തിത്വത്തെ വിലയിരുത്തുമ്പോള്‍ ആദ്യം ശ്രദ്ധിക്കപ്പെടുന്നത് അദ്ദേഹത്തിന്റെ കര്‍മ്മവൈവിധ്യമാണ്. മിമിക്രിയുടെയും നാടകങ്ങളുടെയും വേദികളില്‍ നിന്ന് ജനപ്രിയതയുടെ അനായാസ വഴിയായ ഹാസ്യത്തെ സ്വീകരിച്ചെങ്കിലും, അതില്‍ ഒതുങ്ങിനില്‍ക്കാന്‍ തയ്യാറാകാത്തിടത്താണ് സലീം കുമാര്‍ വ്യത്യസ്തനാവുന്നത്. ഒരു വശത്ത് സാധാരണക്കാരന്റെ നര്‍മ്മബോധത്തെ തൊട്ടുണര്‍ത്തുന്ന കഥാപാത്രങ്ങളും മറുവശത്ത് മനുഷ്യജീവിതത്തിന്റെ ദുരന്തവും ഏകാന്തതയും ആത്മീയ സംഘര്‍ഷങ്ങളും പ്രതിഫലിപ്പിക്കുന്ന ഗൗരവപൂര്‍ണ കഥാപാത്രങ്ങളും അദ്ദേഹം അവതരിപ്പിച്ചു. ഈ ഇരട്ടസാധ്യതയാണ് അദ്ദേഹത്തെ സമകാലിക മലയാള സിനിമയിലെ അപൂര്‍വ പ്രതിഭയാക്കി മാറ്റിയത്. ജീവിതത്തെപ്പറ്റി, ഓര്‍ത്താല്‍ ഒരന്തവുമില്ല, ഓര്‍ത്തില്ലെങ്കില്‍ ഒരു കുന്തവുമില്ല എന്ന് നിര്‍വചിച്ച സലീം പ്രതിഭകൊണ്ടു മാത്രമല്ല, വിട്ടുവീഴ്ചയില്ലാത്ത നിലപാടുകൊണ്ടുകൂടിയാണ് സാംസ്‌കാരികരംഗത്തെ പകരം വയ്ക്കാനില്ലാത്ത സാന്നിദ്ധ്യമായത്.

എറണാകുളം ജില്ലയിലെ വടക്കന്‍ പറവൂരിനടുത്തുള്ള ചിറ്റാറ്റുകരയില്‍ തീര്‍ത്തും സാധാരണമായ കുടുംബ പശ്ചാത്തലത്തില്‍ ഗംഗാധരന്റെയും കൗസല്യയുടെയും മകനായി 1969 ഒക്ടോബര്‍ 10-ന് ജനിച്ച സലിം കുമാര്‍ മതാതീതവും പുരോഗമനപരവുമായ കുടുംബാന്തരീക്ഷത്തിലാണു വളര്‍ന്നത്. മതമേതാണെന്നറിയാതിരിക്കാനാണ് ഗംഗാധരന്‍ മകന് സലീം എന്നു പേരിട്ടത്. അനശ്വര പ്രണയകഥയിലെ നായകന്റെ പേര്. പക്ഷേ അഞ്ചാം ക്‌ളാസില്‍ പേരുപിടിക്കവേ പ്രധാനധ്യാപകന് ആ പേര് പ്രശ്‌നമായി തോന്നി. അതുകൊണ്ട് വാലായി കുമാര്‍ കൂടി ചേര്‍ത്തുകൊണ്ട് അദ്ദേഹമാണ് സലീമിനെ സലീംകുമാറാക്കി മാറ്റുന്നത്. നാലാംക്‌ളാസുവരെ ഇസ്‌ളാമായി ജീവിച്ച താന്‍ അതോടെ ഹിന്ദുവായി എന്നാണ് സഹജ നര്‍മ്മത്തില്‍ തന്റെ പേരിനെപ്പറ്റി അദ്ദേഹം സൂചിപ്പിച്ചിട്ടുള്ളത്. 

വടക്കന്‍ പറവൂര്‍ ഗവ. ലോവര്‍ പ്രൈമറി സ്‌കൂള്‍, ഗവ. ബോയ്‌സ് ഹൈസ്‌കൂള്‍, മാല്യങ്കര എസ്.എന്‍ എം കോളജിലും എറണാകുളം മഹാരാജാസ് കോളജിലുമായിട്ടായിരുന്നു വിദ്യാഭ്യാസം. വിദ്യാഭ്യാസക്കാലത്തേ കെ എസ് യു വിദ്യാര്‍ത്ഥി പ്രസ്ഥാനത്തോടും വേദികളോടും കലാപ്രവര്‍ത്തനങ്ങളോടും പ്രത്യേക താല്‍പര്യം പ്രകടിപ്പിച്ച അദ്ദേഹം അക്കാലത്ത് കേരളമാകെ തരംഗമായ മിമിക്രി പ്രസ്ഥാനത്തിന്റെ ഭാഗമായിത്തീര്‍ന്നു. എം.ജി സര്‍വകലാശാല യുവജനോത്സവത്തില്‍ മൂന്ന് തവണ മിമിക്രിയില്‍ ഒന്നാം സ്ഥാനക്കാരനായി. എണ്‍പതുകളിലും തൊണ്ണൂറുകളിലും കലാഭവന്‍ തുടങ്ങി വച്ച മുന്നേറ്റത്തിന്റെ പിന്തുടര്‍ച്ചക്കാരില്‍ മുന്‍നിരക്കാരനായി സലിം കുമാര്‍. 

കൊച്ചിന്‍ കലാഭവനില്‍ മിമിക്രി ജീവിതം ആരംഭിച്ച സലീം പിന്നീട് കൊച്ചിന്‍ സാഗറില്‍ ചേര്‍ന്നു. സ്വന്തമായി ആരംഭിച്ച ട്രൂപ്പിന്റെ മാനേജരായിരുന്നു പില്‍ക്കാലത്ത് എംഎല്‍എയായിത്തീര്‍ന്ന രമേഷ് പിഷാരടി. കേരളത്തില്‍ ദൂര്ദര്‍ശനുപരി സ്വകാര്യ ചാനലുകള്‍ ചുവടുറപ്പിക്കുന്ന കാലംകൂടിയായിരുന്നു അത്. ഏഷ്യാനെറ്റില്‍ സിനിമാലയ്ക്കു പുറമേ കോമിക്കോള എന്നൊരു പരിപാടിയുണ്ടായിരുന്നു.സലീംകുമാറും രമേഷ് പിഷാരടിയും രമേശ് കുറുമശ്ശേരിയുമൊക്കെയായിരുന്നു കോമിക്കോളയുടെ പരമാത്മാക്കള്‍. സമാനതകളില്ലാത്ത ആ ടെലിവിഷന്‍ ഹാസ്യചിത്രീകരണത്തിലൂടെയാണ് സലീംകുമാറും പിഷാരടിയുമൊക്കെ വീടകങ്ങളിലെ കുടുംബപ്രേക്ഷകരുടെ പ്രിയപ്പെട്ടവരാവുന്നത്.

മിമിക്രിയില്‍ നിന്ന് സിനിമയിലേക്ക്

മിമിക്രി വേദികളില്‍ നേടിയെടുത്ത അവതരണമികവും നിരീക്ഷണപാടവവും ശരീരഭാഷയുമാണ് സിനിമയിലേക്ക് വഴിതുറന്നത്. സിനിമയ്ക്കു പറ്റിയ രൂപമേയായിരുന്നില്ല സലീമിന്റേത്. ലേശം ഇരുണ്ട് ഉരുണ്ട് കണ്ണും അല്‍പമുന്തിയ പല്ലുമൊക്കെയായി ഒരാകാരം. പക്ഷേ ഹാസ്യാവതരണത്തിന് തന്റെ ശരീരത്തെ ഫലപ്രദമായി വിനിയോഗിക്കാന്‍ അദ്ദേഹത്തിനായി. എന്നാല്‍ ഫോര്‍മുലകളുടെയും വ്യവസ്ഥാപിത സങ്കല്‍പങ്ങളുടെയും വാര്‍പ്പുരീതികള്‍ക്കിടയില്‍ തന്റേതായൊരിടം പിടിക്കാന്‍ സലീംകുമാറിന് ഏറെ കഷ്ടപ്പെടേണ്ടിവന്നുവെന്നതാണ് വാസ്തവം.

ചെറുവേഷങ്ങളിലൂടെയാണ് അദ്ദേഹം സിനിമയില്‍ ശ്രദ്ധിക്കപ്പെടുന്നത്. സിദ്ദിഖ് ഷമീറിന്റെ ഇഷ്ടമാണ് നൂറുവട്ടം എന്ന ചിത്രത്തിലെ വളരെ ചെറിയൊരു വേഷത്തിലൂടെ 1996ലായിരുന്നു അരങ്ങേറ്റം. തൊട്ടടുത്ത വര്‍ഷം അന്നത്തെ ഹിറ്റ്‌മേക്കര്‍ സിബിമലയില്‍ ദിലീപിനെ നായകനാക്കി ഒരുക്കിയ നീ വരുവോളം എന്ന ചിത്രത്തില്‍ ഒരു മുഴുനീള വേഷത്തിന് ക്ഷണിച്ചെങ്കിലും അഭിനയിച്ചു തുടങ്ങി രണ്ടുദിവസം കഴിഞ്ഞ് തൃപ്തിവരാത്തതുകൊണ്ട് ഒഴിവാക്കുകയായിരുന്നു. ആ ദുരനുഭവത്തെപ്പറ്റിയും പില്‍ക്കാലത്ത് തന്റെ അനുഭവക്കുറിപ്പുകളിലും അഭിമുഖങ്ങളിലും മറ്റും സരസമായി നര്‍മ്മത്തില്‍ ചാലിച്ചാണ് സലീം അനുസ്മരിച്ചിട്ടുള്ളത്.

വിജി തമ്പി സംവിധാനം ചെയ്ത സത്യമേവ ജയതേ(2000)യി ലെ കള്ളന്റെ വേഷമാണ് ശ്രദ്ധിക്കപ്പെട്ടത്. ഈ ചിത്രത്തിലെ പ്രകടനമാണ് റാഫി-മെക്കാര്‍ട്ടിന്മാരുടെ സൂപ്പര്‍ ഹിറ്റ് ചിത്രമായ തെങ്കാശിപ്പട്ടണത്തി(2000)ലെ മുഖ്യ ഹാസ്യവേഷത്തിലേക്ക് സലീമിനെ കൊണ്ടുചെന്നെത്തിച്ചത്. അദ്ദേഹത്തിന്റെ സവിശേഷമായ ഹാസ്യശൈലി പ്രേക്ഷകരുടെ ശ്രദ്ധ പിടിച്ചുപറ്റി. കഥാപാത്രത്തെ കാര്‍ട്ടൂണാക്കാതെ, അതിലെ മനുഷ്യനെ നിലനിര്‍ത്തിക്കൊണ്ട് ചിരിപ്പിക്കുക എന്നത് അദ്ദേഹത്തിന്റെ പ്രത്യേകതയായിരുന്നു. ഈ സവിശേഷത അദ്ദേഹത്തെ സമകാലിക ഹാസ്യനടന്മാരില്‍ നിന്ന് വ്യത്യസ്തനാക്കി. തെങ്കാശിപ്പട്ടണം ഹിറ്റായതോടെ സലിം കുമാറിന്റെ ഹാസ്യകഥാപാത്രങ്ങള്‍ മലയാള സിനിമയില്‍ രാശിയായി. മായാവിയിലെ സ്രാങ്ക്, കല്യാണരാമനിലെ പ്യാരിലാല്‍, പുലിവാല്‍ കല്യാണത്തിലെ മണവാളന്‍, മീശമാധവനിലെ വക്കീല്‍ മുകുന്ദനുണ്ണി തുടങ്ങിയ കഥാപാത്രങ്ങള്‍ ഇന്നും ട്രോളുകളില്‍ നിറഞ്ഞുനില്‍ക്കുന്നവ കൂടിയാണ്. ഇവയില്‍ റാഫി മെക്കാര്‍ട്ടിന്റെ ചതിക്കാത്ത ചന്തു(2004)വിലെ ഡാന്‍സ് മാസ്റ്റര്‍ വിക്രം മലയാള സിനിമയിലെ ഹാസ്യവേഷങ്ങളില്‍ ഒരു കള്‍ട്ട് തന്നെയായിമാറി. അരികുവല്‍കൃതരും ഇരകളുമായ സാധാരണ മനുഷ്യരുടെ പരിമിതികളും സ്വപ്നങ്ങളും പരാജയങ്ങളും ഉള്‍ക്കൊണ്ട് ഹാസ്യകഥാപാത്രങ്ങളാക്കിയപ്പോഴും അവരെ തന്മയത്തത്തോടെ അവതരിപ്പിക്കാന്‍ അദ്ദേഹം ശ്രമിച്ചു.

വിസ്മയം നടനപ്രകാരം

ഒരു കലാകാരന്റെ യഥാര്‍ത്ഥ കഴിവ് പരീക്ഷിക്കപ്പെടുന്നത് ഹാസ്യത്തില്‍ നിന്നോ ജനപ്രിയതയില്‍ നിന്നോ പുറത്തുകടക്കുമ്പോഴാണ്. സലിം കുമാര്‍ ഈ പരീക്ഷണത്തില്‍ അതുല്യവിജയം നേടി.

ലാല്‍ ജോസ് സംവിധാനം ചെയ്ത 'അച്ഛനുറങ്ങാത്ത വീട്'(2005)  എന്ന ചിത്രത്തിലെ സാമുവല്‍ എന്ന കേന്ദ്ര കഥാപാത്രം സലിംകുമാറിന്റെ മിന്നുന്ന അഭിനയമികവ് വെളിപ്പെടുത്തുന്നതായി. പീഡിപ്പിക്കപ്പെടുന്നൊരു പെണ്‍കുട്ടിയുടെ പിതാവെന്ന നിലയ്ക്ക് സമൂഹം വേട്ടയാടുന്ന സാമുവലിന്റെ ധര്‍മ്മസങ്കടം അത്രമേല്‍ ഹൃദയസ്പര്‍ശിയായി ശരീരഭാഷകൊണ്ടും ആത്മാവുകൊണ്ടും ആവഹിച്ച സലീം കുമാറിനെത്തേടിആ വര്‍ഷത്തെ മികച്ച രണ്ടാമത്തെ നടനുള്ള സംസ്ഥാന അവാര്‍ഡും തേടിയെത്തി.  അതോടെ, വെറുമൊരു ഹാസ്യനടന്‍ എന്ന നിലയില്‍ നിന്ന് ഗൗരവവേഷങ്ങളും കൈകാര്യം ചെയ്യാന്‍ കെല്‍പ്പുള്ള നടനെന്ന നിലയിലേക്ക് സലീമിനു സ്ഥാനപ്രതിഷ്ഠ ലഭിച്ചു. രഞ്ജിതിന്റെ നേതൃത്വത്തില്‍ പുറത്തിറങ്ങിയ കേരളകഫേ(2009)എന്ന ചലച്ചിത്രസമാഹാരത്തില്‍ ഉണ്ണി ആര്‍ എഴുതി അന്‍വര്‍ റഷീദ് സംവിധാനം ചെയ്ത ബ്രിഡ്ജ് എന്ന ഹ്രസ്വചിത്രത്തിലെ അമ്മയെ നടതള്ളുന്ന സലീം കുമാറിന്റെ വേഷം ഏറെ ശ്രദ്ധിക്കപ്പെടുന്നതായി.

സാമൂഹിക യാഥാര്‍ഥ്യങ്ങളുമായി ബന്ധപ്പെട്ട കഥാപാത്രങ്ങളെ അവതരിപ്പിക്കുമ്പോള്‍ അദ്ദേഹം പ്രകടിപ്പിച്ച നിയന്ത്രിതമായ അഭിനയശൈലി നിരൂപകരുടെ പ്രശംസ പിടിച്ചുപറ്റി.വിസ്മയാവഹമായ ഈ പരിണതിയുടെ പൂര്‍ണതയായിരുന്നു ആദാമിന്റെ മകന്‍ അബു. സലിം അഹമ്മദ് സംവിധാനം ചെയ്ത 'ആദാമിന്റെ മകന്‍ അബു'(2010) എന്ന ചിത്രത്തിലെ അഭിനയത്തിന് മികച്ച നടനുള്ള ദേശീയപുരസ്‌കാരവും സംസ്ഥാന പുരസ്‌കാരവും കേരള ഫിലിം ക്രിട്ടിക്‌സ് പുരസ്‌കാരവും ലഭിച്ചു ഇസ്‌ളാമിക പശ്ചാത്തലത്തില്‍ ഒരു സാധാരണ മനുഷ്യന്റെ ആത്മീയയാത്രയെ ആവിഷ്‌കരിച്ച ചിത്രത്തില്‍ അബുവായി അദ്ദേഹം നടത്തിയ പരകായപ്രവേശം ഇന്ത്യന്‍ സിനിമയിലെ തന്നെ മികച്ച അഭിനയങ്ങളില്‍ ഒന്നാണ്. ശരീരഭാഷയില്‍ മാത്രമല്ല,അബുവിന്റെ മുഖത്ത് പ്രത്യക്ഷപ്പെടുന്ന പ്രതീക്ഷയും നിരാശയും വിശ്വാസവും സംശയവും ഒരേസമയം പ്രകടിപ്പിക്കാന്‍ അദ്ദേഹത്തിന് കഴിഞ്ഞു. സംഭാഷണങ്ങളേക്കാള്‍ മൗനങ്ങളിലൂടെയാണ് അബു പ്രേക്ഷകരുമായി സംവദിച്ചത്. സലിം കുമാറിനെ ഹാസ്യത്തിന്റെ വാര്‍പ്പില്‍ നിന്ന് വിടുതല്‍ നല്‍കുന്നതായിരുന്നു ആ വേഷം. അപ്പോഴും, ദേശീയ അവാര്‍ഡ് നേടിയ നടന്‍ എന്ന നിലയ്ക്ക് തുടര്‍ന്ന് തന്നെ ഹാസ്യവേഷങ്ങളില്‍ നിന്നു മാറ്റിനിര്‍ത്തരുത് എന്നായിരുന്നു നടന്‍ എന്ന നിലയ്ക്ക് മുഖ്യധാരാ സിനിമയോട് അദ്ദേഹത്തിന്റെ അഭ്യര്‍ത്ഥന.

ആ ഇച്ഛാശക്തിയുടെ പിന്തുണയോടെ മാട്ടുപ്പെട്ടി മച്ചാന്‍, പട്ടാഭിഷേകം, നാടന്‍ പെണ്ണും നാട്ടുപ്രമാണിയും, കുഞ്ഞിക്കൂനന്‍, സി.ഐ.ഡി മൂസ, തിളക്കം, കിളിച്ചുണ്ടന്‍ മാമ്പഴം, പട്ടാളം, ചതിക്കാത്ത ചന്തു, പെരുമഴക്കാലം, തൊമ്മനും മക്കളും, രാപ്പകല്‍, രാജമാണിക്യം, ചാന്തുപൊട്ട്, കറുത്ത പക്ഷികള്‍, കഥ പറയുമ്പോള്‍, അണ്ണന്‍ തമ്പി, ചട്ടമ്പിനാട്, ബെസ്റ്റ് ആക്ടര്‍, മേരിക്കുണ്ടൊരു കുഞ്ഞാട്, ഉദയനാണ് താരം, കുഞ്ഞനന്തന്റെ കട, അറബിക്കഥ, പത്തേമാരി, വെളിപാടിന്റെ പുസ്തകം, ഡ്രൈവിങ് ലൈസന്‍സ്, തല്ലുമാല തുടങ്ങി നാന്നൂറോളം ചിത്രങ്ങളില്‍ വേഷമിട്ടു. ഇവയില്‍ സി ഐ ഡി മൂസയിലെ ഭ്രാന്തന്‍ എക്കാലത്തെയും മികച്ച ഫാഴ്‌സിക്കല്‍ കോമഡി കഥാപാത്രമായെങ്കില്‍ ഉദയനാണ് താരം, കുഞ്ഞനന്തന്റെ കട തുടങ്ങിയവയിലെ വേഷങ്ങള്‍ അഭിനേതാവെന്ന നിലയ്ക്ക് സലീമിന്റെ കഴിവുകള്‍ തുറന്നുകാട്ടുന്നവയായി. കഥ പറയുമ്പോഴിലെ നിമിഷകവിയൊക്കെ മലയാളികളുള്ളിടത്തോളം കാലം അനശ്വരമായിത്തീരുകയും ചെയ്തു. 'കൂടോത്രം' ആണ് അവസാന ചിത്രം. ലാല്‍ ജോസിന്റെ അയാളും ഞാനും തമ്മില്‍(2012) എന്ന ചിത്രത്തിലെ തൊമ്മാച്ചന്‍ എന്ന കഥാപാത്രത്തിന് മികച്ച ഹാസ്യനടനുള്ള സംസ്ഥാന പുരസ്‌കാരവും സലീം സംവിധാനം ചെയ്ത് ജയ്ഹിന്ദ് ടിവി സംപ്രേഷണം ചെയ്ത പരേതന്റെ പരിഭവങ്ങള്‍ എന്ന ടെലിഫിലിമിലെ പ്രധാനവേഷത്തിന് മികച്ച നടനുള്ള 2013ലെ സംസ്ഥാന ടെലിവിഷന്‍ പുരസ്‌കാരവും ലഭിച്ചു. 

ട്രോളുകളുടെ തമ്പുരാന്‍

മലയാളികളുടെ ദൈനംദിന സംഭാഷണങ്ങളിലേക്ക് കടന്നുവന്ന അനേകം ഡയലോഗുകളും പ്രയോഗങ്ങളുമാണ് സലീം കുമാര്‍ എന്ന കലാകാരന്റെ സാമൂഹികസംഭാവനകളില്‍ പ്രധാനം. പിന്നീട് സോഷ്യല്‍ മീഡിയയിലെ മീം സംസ്‌കാരത്തിലും ഇമോജികളായും സ്റ്റിക്കറുകളായും അദ്ദേഹത്തിന്റെ കഥാപാത്രങ്ങള്‍ അവതാരങ്ങളെടുത്തു.

ട്രോളര്‍മാര്‍ക്ക് സലിമിനെയും ട്രോളര്‍മാരെ സലീമിനും വല്ലാത്ത ഇഷ്ടമായിരുന്നു. ഇത്രയ്ക്ക് ഇഷ്ടമായതെന്തെന്ന് ചോദിച്ചാല്‍ അതിന് സലിമിന്റേതായൊരു ന്യായീകരണവുമുണ്ട് ''നമ്മളൊരു ഡയലോഗ് പറയുമ്പോള്‍ അതിന്റെ ഭാവം കൃത്യമായി മുഖത്തു വരണം. അത് നന്നായി വരുന്നതുകൊണ്ടാണ് എന്റെ ചിത്രങ്ങള്‍ ട്രോളുകളില്‍ കൂടുതലായി ഉപയോഗിക്കുന്നത്. സത്യത്തില്‍ ഞാന്‍ എന്ന നടന് കിട്ടുന്ന വലിയ അവാര്‍ഡാണവ. എന്റെ ചിത്രങ്ങള്‍ വച്ചുള്ള ട്രോളുകള്‍ വാട്സാപ്പിലൊക്കെ വരുമ്പോള്‍ സന്തോഷവും കൗതുകവുമൊക്കെ തോന്നും'.

സലീമിന്റേതുമാത്രമായ സൂപ്പര്‍ഹിറ്റു സംഭാഷണങ്ങളെത്രയോ മലയാളി നിത്യ ജീവിതത്തിന്റെ അവിഭാജ്യഘടകമാണ് എന്തിനോ വേണ്ടി തിളയ്ക്കുന്ന സാമ്പാര്‍',ഐ ആം ദ സോറി അളിയാ... ഐ ആം ദ സോറി, കാണാന്‍ വലിയ ലുക്കില്ലെന്നേയുള്ളു ഭയങ്കര ബുദ്ധിയാ... പോലുള്ള ഡയലോഗുകള്‍ ഒരിക്കലെങ്കിലും പ്രയോഗിക്കാത്തവര്‍ ചുരുങ്ങും. ഇവയില്‍പ്പലതും സലീമിന്റെ സ്വന്തം സംഭാവനകളുമാണ്.'ഈ രാജാവിന്റെ പേരെന്താണ്?' എന്ന് ചോദിക്കുമ്പോള്‍ 'ശശി, തിരുവിതാംകൂര്‍ രാജാവ്' എന്നും 'നരന്‍' എന്ന ചിത്രത്തില്‍ വഞ്ചിയില്‍ പോവുമ്പോള്‍ 'വിന്‍ഡോ സീറ്റിലിരിക്കാം' എന്നു പറയുന്ന ഡയലോഗും സലീം കൈയില്‍ നിന്നിട്ടതാണ്.

രചന, സംവിധാനം സലിം കുമാര്‍

നടന്‍ എന്ന നിലയില്‍ മാത്രം ഒതുങ്ങുന്നതായിരുന്നില്ല സലിം കുമാരിന്റെ ചലച്ചിത്രജീവിതം. നടന്‍ എന്ന നിലയ്ക്ക് ഹാസ്യത്തില്‍ മാത്രമൊതുങ്ങാത്തതുപോലെ അഭിനയത്തിനപ്പുറം രചനാ സംവിധാനരംഗത്തും പ്രതിഭ തെളിയിച്ചിട്ടുണ്ട് സലീം. അതാകട്ടെ, വെറുമൊരാഗ്രഹത്തിന്റെ കേവലപൂര്‍ത്തീകരണമായിരുന്നില്ലെന്നത് അദ്ദേഹത്തിന്റെ ചലച്ചിത്രങ്ങള്‍ നേടിയ ബഹുമതികള്‍ തെളിയിക്കുന്നു. ംവിധായകനെന്ന നിലയില്‍ അദ്ദേഹം തിരഞ്ഞെടുക്കുന്ന വിഷയങ്ങളില്‍ സാമൂഹിക ബോധവും മനുഷ്യസ്‌നേഹവും പ്രകടമായിരുന്നു.

ആദ്യ സംവിധാനസംരംഭമായ കമ്പാര്‍ട്ട്‌മെന്റ് (2015) ഒരു ട്രെയിന്‍ യാത്രയുടെ പശ്ചാത്തലത്തില്‍ വ്യത്യസ്ത സാമൂഹിക വിഭാഗങ്ങളില്‍പ്പെട്ട മനുഷ്യരുടെ ജീവിതാനുഭവങ്ങളെ കോര്‍ത്തിണക്കിയ ചിത്രമായിരുന്നു. വിവിധ സൂമൂഹിക ശ്രേണിഭിന്നതകള്‍ മനുഷ്യബന്ധങ്ങളിലുണ്ടാക്കുന്ന സങ്കീര്‍ണതയാണ് സിനിമയില്‍ സലീം വരച്ചുകാട്ടിയത്. വാണിജ്യവിജയം ലക്ഷ്യമാക്കിയുള്ള ഫോര്‍മുലകളില്‍ നിന്ന് മാറിയുള്ള ദൃശ്യഭാവുകത്വമായിരുന്നു ആ സിനിയില്‍ നിഴലിച്ചത്.സംവിധായകനെന്ന നിലയിയ്ക്ക,് ഭിന്നശേഷിക്കാരായ രണ്ടു ചെറുപ്പക്കാരെ ഉപയോഗിച്ച് കേരളസമൂഹത്തിന്റെ വൈവിധ്യവും മനുഷ്യമനസുകളുടെ വൈരുദ്ധ്യവും അവതരിപ്പിച്ച സലീമിന്റെ സാമൂഹിക നിരീക്ഷണശേഷി ഈ ചിത്രത്തില്‍ വ്യക്തമാകുന്നുണ്ട്.

സംവിധായകനെന്ന നിലയില്‍ സലിം കുമാറിനെ മലയാള സിനിമാചരിത്രത്തില്‍ സഗൗരവമടയാളപ്പെടുത്തുന്ന സൃഷ്ടിയാണ് കറുത്ത ജൂതന്‍ (2017). കേരളത്തിലെ ജൂതസമൂഹത്തിന്റെ ചരിത്രപശ്ചാത്ത ലവും സ്വത്വപ്രശ്‌നങ്ങളും സ്പര്‍ശിച്ച ചിത്രം മലയാള സിനിമ അപൂര്‍വമായി മാത്രം കൈകാര്യം ചെയ്ത വിഷയത്തെയാണവതരിപ്പിച്ചത്. മതപരവും സാംസ്‌കാരികവുമായ സ്വത്വങ്ങള്‍ എങ്ങനെ രൂപപ്പെടുന്നു, ന്യൂനപക്ഷസമൂഹങ്ങളുടെ ഓര്‍മ്മകള്‍ എങ്ങനെ ചരിത്രത്തില്‍ രേഖപ്പെടാതെ പോകുന്നു തുടങ്ങിയ ചോദ്യങ്ങളാണ് ചിത്രം ഉയര്‍ത്തിയത്. കേരളത്തില്‍ ജീവിച്ച 'കറുത്ത ജൂതന്മാരില്‍' ഒരാളായ ആരോണ്‍ ഇല്യാഹുവായി വേഷമിട്ടത് സലീം കുമാര്‍ തന്നെയാണ്. തന്റെ കുടുംബം ഇസ്രയേലിലേക്ക് പോയെങ്കിലും കേരളത്തില്‍ തന്നെ തുടരാന്‍ തീരുമാനിച്ച രോണിന്റെ ജീവിതത്തിലൂടെയും, അദ്ദേഹത്തിന്റെ മരണത്തിന് ശേഷം നടക്കുന്ന സംഭവങ്ങളിലൂടെയുമാണ് കഥ മുന്നേറുന്നത്. കേരള രാജ്യാന്തര ചലച്ചിത്രമേളയില്‍ മലയാള സിനിമാവിഭാഗത്തില്‍ ഏറെ ശ്രദ്ധിക്കപ്പെട്ട ചിത്രമായിരുന്നു കറുത്ത ജൂതന്‍. ്വന്തം മാതാവിനെയും സഹോദരിയെയും വെടിഞ്ഞ് സ്വന്തം സമുദായത്തിന്റെ ചരിത്രം തേടിപ്പോയ ആരോണിന് പിന്നീട് നാട്ടിലേക്ക് തിരിച്ചു വരുമ്പോള്‍ താന്‍ ജൂതനാണെന്നത് പോലും തെളിയിക്കേണ്ട അവസ്ഥയാണ് വന്നു പെടുന്നത്. കഥ, തിരക്കഥ, സംഭാഷണം എന്നിവയിലും അദ്ദേഹത്തിന്റെ പങ്കാളിത്തമുണ്ടായിരുന്നു. ഈ ചിത്രത്തിന്റെ കഥയ്ക്ക് സംസ്ഥാന ചലച്ചിത്ര പുരസ്‌കാരവും ലഭിച്ചു. സംവിധായകനെന്ന നിലയില്‍ അദ്ദേഹത്തിന്റെ ബൗദ്ധിക ജിജ്ഞാസയും സാമൂഹിക പ്രതിബദ്ധതയും വ്യക്തമായ ചിത്രമായിരുന്നു അത്.

സംവിധായകനായുള്ള മൂന്നാമൂഴത്തില്‍ ദൈവമേ കൈതൊഴാം കെ. കുമാരാകണം (2018) എന്ന ചിത്രത്തില്‍  ജനപ്രിയ സിനിമയുടെ ഭാവുകത്വമാണ് സലീം സ്വീകരിച്ചതെങ്കിലും, വിശ്വാസം, ആധുനിക ജീവിതം, തുടങ്ങിയ വിഷയങ്ങളെ ആക്ഷേപഹാസ്യത്തിന്റെ രൂപത്തില്‍ അവതരിപ്പിക്കുക വഴി സാമൂഹികമായ തന്റെ നിലപാടുകള്‍ക്ക് അടിവരയിടുകയായിരുന്നു അദ്ദേഹം.

എഴുത്തും വായനയും

രാഷ്ട്രീയ സാമൂഹിക വിഷയങ്ങളില്‍ ഉള്‍ക്കാഴ്ച പുലര്‍ത്തിയ സിനിമാക്കാരനായിരുന്നു സലീം കുമാര്‍. കലാകാരന്‍ നിഷ്പക്ഷതയുടെ മൂടുപടമണിഞ്ഞഅരാഷ്ട്രീയവാദിയാവുന്നതിനോട് അദ്ദേഹം യോജിച്ചില്ല. സാമൂഹികചര്‍ച്ചകളിലും മറ്റും  സജീവ സാന്നിധ്യമായിരുന്ന സലീം കോണ്‍ഗ്രസ് പാര്‍ട്ടിയോടുള്ള തന്റെ രാഷ്ട്രീയ നിലപാടും ഒരിക്കലും ഒളിച്ചുവയ്ക്കാനിഷ്ടപ്പെട്ടില്ല. അഭിമുഖങ്ങളില്‍ അദ്ദേഹം പ്രകടിപ്പിച്ച നിരീക്ഷണങ്ങള്‍ പലപ്പോഴും മുഖ്യധാരാ ധാരണകളെ ചോദ്യം ചെയ്യുന്നതായിരുന്നു. ചരിത്രം, മതം, രാഷ്ട്രീയം, സാഹിത്യം എന്നിവയിലുള്ള അദ്ദേഹത്തിന്റെ താല്‍പര്യം അദ്ദേഹത്തിന്റെ സംഭാഷണ ങ്ങളില്‍ പ്രകടമായിരുന്നു. എന്നാല്‍ മറ്റുള്ളവനെ വേദനിപ്പിക്കുന്നതൊന്നും അദ്ദേഹത്തിന്റെ വായില്‍ നിന്നോ പെരുമാറ്റത്തില്‍ നിന്നോ ഉണ്ടായിട്ടില്ല. സ്വാനുഭവങ്ങളുടെ വേദന വിവരിക്കേണ്ടിവരുമ്പോഴും ആരെയും മുറിവേല്‍പ്പിക്കാതെ സ്വതസിദ്ധമായ തമാശയില്‍ പൊതിഞ്ഞ് അതിശയോക്തിപരമായി അവതരിപ്പിച്ചിരുന്ന അദ്ദേഹം തന്റെ കണ്ണീര് എന്നും മറ്റുള്ളവര്‍ കാണാതെ നോക്കാന്‍ ശ്രദ്ധിച്ചു. അദ്ദേഹത്തിന്റെ പേരില്‍ പുറത്തുവന്ന ഈശ്വരാ വഴക്കില്ലല്ലോ എന്ന പുസ്തകം ആത്മകഥയല്ലെന്നാണ് സലിം കുമാര്‍ പറഞ്ഞിട്ടുള്ളത്. വിനോദയാത്ര കഴിഞ്ഞു തിരിച്ചെത്തിയ പ്രിയപ്പെട്ടവരുടെ യാത്രാ വിവരണം പോലെ ജനനമെന്ന സ്റ്റാര്‍ട്ടിങ് പോയിന്റില്‍ നിന്ന് മരണം എന്ന ഫിനിഷിങ് പോയിന്റിലേക്കു നടത്തുന്ന യാത്ര. ഇതിനിടെ കണ്ടുമുട്ടിയ കഥാപാത്രങ്ങള്‍. അനുഭവങ്ങള്‍. അങ്ങനെയാണ് സലീം തന്റെ പുസ്തകത്തെ വിശേഷിപ്പിച്ചത്.

ആര്‍ക്കുമുന്നിലും തന്റെ സ്വത്വമോ സ്വാതന്ത്ര്യമോ പണയം വയ്ക്കാന്‍ സന്നദ്ധനല്ലായിരുന്ന സലീം സ്വന്തം അമ്മയ്ക്കു മുന്നില്‍ മാത്രം കീഴടങ്ങി. ലാഫിങ് വില്ല എന്നു പേരിട്ട വീട്ടില്‍ ഭാര്യയ്ക്കും രണ്ടാണ്‍മക്കള്‍ക്കുമൊപ്പം ജീവിക്കുമ്പോഴും രോഗം അലട്ടുമ്പോഴും വിധിയെന്നു പഴിക്കാതെ എല്ലാ പ്രതിസന്ധികളെയും പ്രതികൂലതകളെയും വെല്ലുവിളിയായി സ്വീകരിച്ച് പൊതുമണ്ഡലത്തില്‍ സജീവമായും അവസാനം വരെയും കര്‍മ്മനിരതനായും നിലനില്‍ക്കാന്‍ പ്രത്യേകം ശ്രദ്ധിച്ചു.കേരളത്തിന്റെ സാംസ്‌കാരിക ചരിത്രത്തില്‍ സലിം കുമാര്‍ എന്ന പേര് നിലനില്‍ക്കുക അനശ്വരമായ ചില ഹാസ്യ മുഹൂര്‍ത്ത ങ്ങളുടെ സ്രഷ്ടാവായി മാത്രമല്ല, കലയുടെ വിവിധ സാധ്യതകളെ നിരന്തരം അന്വേഷിച്ച കലാകാരനായി മാത്രമല്ല, മറിച്ച് നിലപാടുകളില്‍ വ്യതിചലിക്കാത്തൊരു വ്യക്തിയായിക്കൂടിയാണ്. മരണാനന്തരം തനിക്ക് മതപരമായ ആചാരങ്ങളൊന്നുമുണ്ടാവരുത് എന്നു കുടുംബാംഗങ്ങളോട് നിഷ്‌കര്‍ഷിച്ചതില്‍പ്പോലും പ്രതിബദ്ധതയുള്ളൊരു മനുഷ്യന്റെ തളരാത്ത ഇച്ഛാശക്തി കാണാം.സിനിമയില്‍ വരുന്നതിനു മുമ്പാണ് സലീംകുമാര്‍ സുനിതയെ ജീവിതസഖിയാക്കിയത്. അവരുടെ ചന്തു, ആരോമല്‍ എന്നീ മക്കളില്‍ ചന്തു അടുത്തിടെ മഞ്ഞുമ്മല്‍ ബോയ്‌സ്, ലോകാ ചാപ്റ്റര്‍ വണ്‍ ചന്ദ്ര തുടങ്ങിയ ചിത്രങ്ങളിലൂടെ ഏറെ ശ്രദ്ധേയനായി തിളങ്ങിയ യുവനടനാണ്.

കേരളത്തിന്റെ സാംസ്‌കാരിക ചരിത്രത്തില്‍ സലിം കുമാര്‍ എന്ന പേര് നിലനില്‍ക്കുക അനശ്വരമായ ചില ഹാസ്യ മുഹൂര്‍ത്തങ്ങളുടെ സ്രഷ്ടാവായി മാത്രമല്ല, കലയുടെ വിവിധ സാധ്യതകളെ നിരന്തരം അന്വേഷിച്ച കലാകാരനായി മാത്രമല്ല, മറിച്ച് നിലപാടുകളില്‍ വ്യതിചലിക്കാത്തൊരു വ്യക്തിയായിക്കൂടിയാണ്. മരണാനന്തരം തനിക്ക് മതപരമായ ആചാരങ്ങളൊന്നുമുണ്ടാവരുത് എന്നു കുടുംബാംഗങ്ങളോട് നിഷ്‌കര്‍ഷിച്ചതില്‍പ്പോലും പ്രതിബദ്ധതയുള്ളൊരു മനുഷ്യന്റെ തളരാത്ത ഇച്ഛാശക്തി കാണാം.

സലിം കുമാര്‍ : കാണാതെ പോയ കണ്ണീര്‍

Kala Kaumudi weekly
2026 June 14

 എ.ചന്ദ്രശേഖര്‍

ആരായിരുന്നു മലയാളിക്ക് സലീംകുമാര്‍? ജീവിതത്തിലൊരിക്കലെങ്കിലും സലീമിന്റെ സിനിമ കണ്ടിട്ടുള്ള, സമൂഹമാധ്യമങ്ങളില്‍ ഏതെങ്കിലും  ചര്‍ച്ചകളില്‍ സജീവമായി പങ്കെടുത്തിട്ടുള്ള, വാട്‌സാപ്പ് ചര്‍ച്ചകളില്‍ പ്രതികരിച്ചിട്ടുള്ള, ഒരാള്‍ക്ക് സലീം കുമാര്‍ എന്തായാലും ഒരഭിനേതാവു മാത്രമല്ല, മറിച്ച് അവരുടെ ജീവിതത്തില്‍ അത്രയേറെ ഇടപെട്ടിട്ടുളള, അവരുടെ പ്രതികരണങ്ങള്‍ക്ക് ചില പുതുമാനവും രൂപവും ഭാഷയും നല്‍കിയിട്ടുള്ളൊരു പ്രതിഭയാണ്, പ്രതിഭാസമാണ്. തലമുറകളുടെ ആത്മസംഘര്‍ഷങ്ങളെ സരസവും ലളിതവും സംവേദനക്ഷമവുമായ ചില മീമുകളും മൈമുകളും ഡയലോഗുകളും മോണോലോഗുകളുമാക്കി ആവിഷ്‌കരിച്ച കലാകാരന്‍. 'അയാം ദ സോറി അളിയാ അയാം ദ സോറി' എന്നോ 'ഡോണ്ടൂ ഡോണ്ടൂ', 'കാണാന്‍ വലിയ ലുക്കില്ലെന്നേയുള്ളു ഭയങ്കര ബുദ്ധിയാ...' എന്നോ ജീവിതത്തില്‍ ഒരിക്കലെങ്കിലും പറഞ്ഞിട്ടില്ലാത്ത മലയാളി ആ സംഭാഷണശകലങ്ങള്‍ക്ക് ഈ പ്രതിഭയോട് കടപ്പെട്ടിരിക്കുന്നു. അതാണ് ഇതര ഹാസ്യനടന്മാരില്‍ നിന്ന് സലീമിനെ വിഭിന്നനാക്കുന്നതും.

സിനിമയുടെ ചിട്ടവട്ടങ്ങള്‍ക്കൊത്ത രൂപസൗകുമാര്യമൊന്നുമായിരുന്നില്ല, ലേശമിരുണ്ട് കിളരം കൂടിയ സലീം കുമാറിന്റേത്. എന്നിട്ടും സ്വന്തം ശരീരത്തെ ആക്ഷേപിച്ചുകൊണ്ടോ ഉപയോഗപ്പെടുത്തിക്കൊണ്ടോ ഉള്ള ഹാസ്യാവതരണശൈലിയായിരുന്നില്ല അദ്ദേഹത്തിന്റെത്. സ്‌കിറ്റ് അഥവാ ഹാസ്യരൂപകങ്ങളും ഹാസ്യചിത്രീകരണങ്ങളും ധാരാളം സൃഷ്ടിച്ചിട്ടുള്ളതുകൊണ്ടുതന്നെ രംഗസന്ദര്‍ഭങ്ങള്‍ക്കനുയോജ്യമായ ചില സംഭാഷണങ്ങള്‍ സ്വയം സൃഷ്ടിച്ചുകൊണ്ടാണ് സലീം കുമാര്‍ സ്വന്തം കഥാപാത്രങ്ങള്‍ക്ക് പുതിയൊരു മാനം നല്‍കിയത്. സന്ദര്‍ഭത്തില്‍ നിന്ന് അടര്‍ത്തിമാറ്റാനാവാത്തവിധം സ്വയം സൃഷ്ടിച്ച് സംവിധായകന്റെ കാലുപിടിച്ച് ഉള്‍പ്പെടുത്തിയ കല്യാണരാമനിലെ 'എന്തിനോ തിളയ്ക്കുന്ന സാമ്പാര്‍!' എന്ന ആത്മഗതം പില്‍ക്കാലത്ത് മലയാളിയുടെ നിത്യജീവിതത്തില്‍ നിന്ന് അടര്‍ത്തിമാറ്റാനാവാത്തൊരു പ്രയോഗം തന്നെയായിത്തീര്‍ന്നതോര്‍ക്കുക.

സലിം കുമാറിന്റെ കലാജീവിതത്തെ പൊതുവേ രണ്ടായി തിരിക്കാം. ഹാസ്യനടനെന്ന നിലയിലുള്ള ആദ്യപകുതിയും, വൈവിദ്ധ്യമാര്‍ന്ന അഭിനയശേഷി ആവശ്യപ്പെട്ട ഗൗരവമുള്ള വേഷങ്ങളും, രചനയും സംവിധാനവും നിര്‍വഹിച്ച സിനിമകളും ഉള്‍പ്പെടുന്ന രണ്ടാം ഘട്ടവും. ഈ രണ്ടുഘട്ടങ്ങളിലും സാധാരണ മനുഷ്യരുടെ ജീവിതാനുഭവങ്ങളെ നര്‍മ്മത്തിന്റെ ഭാഷയില്‍ അവതരിപ്പിക്കാനും, മനുഷ്യവേദനയും ആത്മസംഘര്‍ഷങ്ങളും ആത്മാര്‍ത്ഥമായി ആവിഷ്‌കരിക്കാനും അദ്ദേഹത്തിന് അനായാസം സാധിച്ചു. 

1969 ഒക്ടോബര്‍ 10-ന് എറണാകുളം ജില്ലയിലെ വക്കന്‍പറവൂരിലെ ചിറ്റാറ്റുകരയില്‍ ഗംഗാധരന്റെയും കൗസല്യയുടെയും മകനായാണ് സലിം കുമാര്‍ ജനിച്ചത്. മതാതീത ചിന്തകള്‍ക്ക് പ്രാധാന്യം നല്‍കിയ പിതാവ്, മതപരമായ തിരിച്ചറിയലുകളെ മറികടക്കുക്കുംവിധം മകനെ 'സലിം' എന്നാണ് പേരുവിളിച്ചത.്  കേരളത്തില്‍ അക്കാലത്തും പിന്നീടും ഹൈന്ദവരില്‍ അത്രമേല്‍ സാധാരണമല്ലാത്ത ഒരു പേരായിരുന്നു അത്. അതുകൊണ്ടുതന്നെ പിന്നീട് സ്‌കൂള്‍ പഠനകാലത്ത് അഞ്ചാംക്‌ളാസില്‍ ഔദ്യോഗിക രേഖകളിലേക്ക് പേരു ചേര്‍ത്ത പ്രധാനാധ്യാപകന് ആ പേരില്‍ സന്ദേഹം തോന്നി. അദ്ദേഹത്തിന്റെ സംഭാവയില്‍ കൂട്ടിച്ചേര്‍ക്കപ്പെട്ട തന്റെ പേരിലെ കുമാറിനെപ്പറ്റി സലീം ടച്ചോടെ പിന്നീടദ്ദേഹം പറഞ്ഞിട്ടുള്ളതിങ്ങനെ- 'അങ്ങനെ അഞ്ചാം ക്‌ളാസുവരെ ഞാന്‍ മുസ്‌ളീമായി ജീവിച്ചു. പിന്നീടാണ് ഹിന്ദുവായത്!' ജീവിതത്തെപ്പറ്റി, 'ചിന്തിച്ചാല്‍ ഒരന്തവുമില്ല, ചിന്തിച്ചില്ലെങ്കില്‍ ഒരു കുന്തവുമില്ല' എന്ന ഒറ്റവരിയില്‍ വിവരിക്കുമായിരുന്ന സലീംകുമാറിലെ വി.കെ.എന്നിനെ തിരിച്ചറിയാന്‍ ഇതിലും വലിയ തെളിവുകള്‍ അന്വേഷിച്ചലയേണ്ടതില്ല.കടുത്ത ആരോഗ്യപ്രതിസന്ധിയില്‍ ജീവിതം തന്നെ ഒരു ചോദ്യചിഹ്നമായി നില്‍ക്കുമ്പോഴും ലോകത്തെ ചിരിപ്പിക്കാനും ലോകത്തെ നോക്കി ചിരിക്കാനും സാധിച്ചിട്ടുണ്ടെങ്കില്‍ സലീം കുമാര്‍ എന്ന കലാകാരന്റെ ജീവിതവീക്ഷണത്തിന്റെ ദൃഷ്ടാന്തമാണത്

വടക്കന്‍ പറവൂര്‍ ഗവണ്‍മെന്റ് സ്‌കൂളുകളിലും തുടര്‍ന്ന് മാല്യങ്കര എസ്.എന്‍.എം. കോളജിലും എറണാകുളം മഹാരാജാസ് കോളജിലുമായിരുന്നു സലീം വിദ്യാഭ്യാസം. പൂര്‍ത്തിയാക്കിയത്. പൂര്‍ത്തിയാക്കിയത് എന്നു പറഞ്ഞാല്‍ പൂര്‍ണാര്‍ത്ഥത്തില്‍ അതു വാസ്തവമല്ല. കാരണം സലീം കുമാറിന് ബിരുദം പൂര്‍ത്തിയാക്കാനായില്ല. അപ്പോഴേക്ക് അയാള്‍ സിനിമയില്‍ ചേക്കേറിക്കഴിഞ്ഞിരുന്നു. വക്കീലാവാനായിരുന്നു താല്‍പര്യം. എന്നാല്‍ മഹാരാജാസില്‍ വിദ്യാര്‍ത്ഥിയായിരിക്കെ തന്നെ കലാപ്രവര്‍ത്തനങ്ങ ളോടും പൊതുപ്രവര്‍ത്തനങ്ങളോടും താല്‍പര്യം പ്രകടിപ്പിച്ച സലീം കേരളത്തില്‍ ഉത്സവ -പൊതുവേദികളില്‍ കഥാപ്രസംഗങ്ങളെയും ഒരളവുവരെ നാടകങ്ങളെയും മറികടന്ന് ശ്രദ്ധേയമായിക്കഴിഞ്ഞ മിമിക്രി പ്രസ്ഥാനത്തിന്റെ ഭാഗമായി. മഹാത്മാഗാന്ധി സര്‍വകലാശാല യുവജനോത്സവങ്ങളില്‍ തുടര്‍ച്ചയായി പുരസ്‌കാരങ്ങള്‍ നേടിയതിലൂടെ സലീം കുമാര്‍ എന്ന കലാകാരന്‍ ശ്രദ്ധിക്കപ്പെട്ടു.ടെലിവിഷന്‍-സിനിമാനിര്‍മ്മാതാക്കളുടെയും ശ്രദ്ധയില്‍പ്പെട്ടു.

സിദ്ദിഖ് ഷമീറിന്റെ ഇഷ്ടമാണ് നൂറുവട്ടം എന്ന ചിത്രത്തിലെ നായകന്റെ സുഹൃദ്‌സംഘത്തിലൊരാളായി 1996 ലായിരുന്നു അരങ്ങേറ്റം. 1997സാങ്കേതികമായി ആ അവസരം തേടിയെത്തിയതാണെങ്കിലും തുടര്‍ന്ന് സിനിമയിലെ അദ്ദേഹത്തിന്റെ പയനം ഒട്ടുമേ അനായാസമായിരുന്നില്ല. അപ്പോഴേക്ക് സുനിതയെ അദ്ദേഹം വിവാഹം കഴിക്കുകയും ചെയ്തിരുന്നു. അഭിനയജീവിതത്തില്‍ തേടിയെത്തിയ പ്രധാനപ്പെട്ട ആദ്യത്തെ മുഴുനീള വേഷത്തില്‍ നിന്ന് അപമാനിക്കപ്പെട്ട് പുറത്താക്കപ്പെട്ട ദുരനുഭവം നേരിടേണ്ടി വന്നിട്ടുണ്ട് സലീമിന്. മാധ്യമപ്രവര്‍ത്തകനെന്ന നിലയ്ക്ക് ഈ ലേഖകന്‍ അതിനു സാക്ഷിയാവുകയും ചെയ്തിട്ടുണ്ട്.

1997ലാണത് ഞാനന്ന് കോട്ടയത്ത് മലയാളമനോരമയില്‍ സബ് എഡിറ്ററാണ്. പ്രത്യേക താല്‍പര്യത്തില്‍ സിനിമാപ്പേജില്‍ അഭിമുഖങ്ങളും മറ്റുമെഴുതുന്നുണ്ട്.  സിബി മലയില്‍ ദിലീപിനെ നായകനും ദിവ്യ ഉണ്ണിയെ നായികയുമാക്കി സംവിധാനം ചെയ്യുന്ന നീ വരുവോളം എന്ന ഏറ്റവും പുതിയ ചിത്രത്തിന്റെ ഷൂട്ടിങ് കോട്ടയത്താണ്. എന്റെ സഹപാഠിയായിരുന്ന ജി.എ.ലാല്‍ ആണ് തിരക്കഥ.ആ ബന്ധത്തില്‍ സിബി മലയിലിനെയും ജഗതി ശ്രീകുമാറിനെയും മറ്റും അഭിമുഖം ചെയ്യാന്‍ ഞാന്‍ അയമനം തിരുവാറ്റയിലെ സിനിമയുടെ സെറ്റില്‍ മുന്നുനാലു ദിവസമുണ്ടായിരുന്നു. തിരുവാറ്റയിലാണ് ഓലമേഞ്ഞ ട്യൂട്ടോറിയല്‍ കോളജ് സെറ്റിട്ടിരിക്കുകയാണ്. സിബി മലയിലിനെ അഭിമുഖം ചെയ്യാന്‍ സെറ്റില്‍ ചെന്ന ദിവസം, ചിത്രീകരിക്കാനിരുന്ന രംഗത്ത് അധ്യാപികയായ മഞ്ജു പിള്ളയ്ക്കൊപ്പം അഭിനയിക്കാന്‍ ആയിടയ്ക്ക് ഏഷ്യാനെറ്റിലെ കോമിക്കോളയിലും മറ്റും തിളങ്ങി നിന്ന സലീംകുമാറാണ് വന്നത്. ഒന്നു രണ്ടു സിനിമകളില്‍ മുഖം കാണിച്ചിട്ടുണ്ടെങ്കിലും താരതമ്യേന പുതുമുഖമാണ്. സെറ്റില്‍ ആദ്യമെത്തിയ ദിവസമായതുകൊണ്ട് വസ്ത്രാലങ്കാരകന്‍ കൊടുത്ത കോസ്റ്റ്യൂം ഇട്ടുകൊണ്ട് സംവിധായകനെ കാണിക്കാന്‍ എത്തിയതാണ്. സിബി സാര്‍ അദ്ദേഹത്തെ ഒന്നു നോക്കിയിട്ടു പറഞ്ഞു ആ ഗ്ളാസ് വേണ്ട.മറ്റൊരു ഗ്ളാസാവട്ടെ. കോസ്റ്റ്യൂമര്‍ കൊടുത്ത രണ്ടാമത്തെ ഗ്ളാസ് വച്ച് നിന്നപ്പോള്‍ സിബി സാര്‍ ഒ കെ പറഞ്ഞു. ആ ദിവസം സലീമും മഞ്ജുവുമൊത്തുള്ള ഒന്നു രണ്ടു രംഗങ്ങളാണ് ചിത്രീകരിച്ചത്.

നാലഞ്ചു ദിവസം കഴിഞ്ഞ്, ജഗതിച്ചേട്ടന്റെ അഭിമുഖത്തിനായി വീണ്ടും അതേ സെറ്റിലെത്തുമ്പോള്‍ എന്നെ അദ്ഭുതപ്പെടുത്തിക്കൊണ്ട് അന്ന് മഞ്ജുപിള്ളയോടൊപ്പം നേരത്തേ സലീംകുമാര്‍ ഇട്ട കോസ്റ്റ്യൂമുമായി ഇന്ദ്രന്‍സ്. പിന്നീടാണറിഞ്ഞത്. ഒന്നുരണ്ടു ദിവസം സലീംകുമാറിനെവച്ചു ഷോട്ടെടുത്തിട്ട് തൃപ്തിയാവാതെ അദ്ദേഹത്തെ ഒഴിവാക്കി ഇന്ദ്രന്‍സിനെ വിളിച്ചുവരുത്തിയതാണ്. പില്‍ക്കാലത്ത്, സലീം കുമാര്‍ തന്നെ സ്വതസിദ്ധമായ ശൈലിയില്‍ അന്ന്, ആ റോള്‍ നഷ്ടപ്പെട്ട ദിവസം ജീവിതത്തില്‍ അനുഭവിച്ച ആത്മസംഘര്‍ഷത്തെപ്പറ്റി എഴുതിയിട്ടുണ്ട്. ഏറെ പ്രതീക്ഷയോടെ വന്ന് മേക്കപ്പിട്ട് രണ്ടു ദിവസം അഭിനയിച്ചിട്ട് അഭിനയം പോരാ എന്ന വിലയിരുത്തലോടെ സെറ്റില്‍ നിന്ന് പറഞ്ഞുവിട്ടപ്പോഴുണ്ടായ നിരാശ, അപമാനം. അതിലുമേറെ സങ്കടവും വേദനയുമായത് കയ്യില്‍ നയാപ്പൈസ പോലുമുണ്ടായിരുന്നില്ല എന്നതാണ്. രണ്ടുദിവസത്തെ അഭിനയത്തിന് വിളിച്ചുവരുത്തിയിട്ട്, മിമിക്രി കലാകാരനെന്ന നിലയില്‍ അറിയപ്പെട്ടിരുന്നിട്ടുപോലും സലീമിന് തിരികെ പോകാനുള്ള വണ്ടിക്കാശുപോലും കൊടുത്തിട്ടു ണ്ടായിരുന്നില്ല അണിയറപ്രവര്‍ത്തകര്‍. എന്തു ചെയ്യണമെന്നറിയാതെ കോട്ടയം റയില്‍വേ സ്റ്റേഷനില്‍ വിഷണ്ണനായി നില്‍ക്കെ പരിചയപ്പെട്ടൊരു വിദേശ മലയാളിയില്‍ നിന്ന് വണ്ടിക്കാശ് വാങ്ങേണ്ടി വന്നതിനെക്കുറിച്ചൊക്കെ സ്ഥായിയായ നര്‍മ്മത്തില്‍ ചാലിച്ചാണ് പറവൂരിലെ ലാഫിങ് വില്ലയുടെ നായകന്‍ സലീംകുമാര്‍ എഴുതിയിട്ടുള്ളത്. അന്നു തിരസ്‌കൃതനായ നടന്‍ പിന്നെ ഇന്ത്യ കണ്ട ഏറ്റവും മികച്ച നടന്മാരിലൊരാളായി പരിണമിച്ചത് ചരിത്രം നല്‍കിയ മറുപടി.

 ലാല്‍ തന്നെ തിരക്കഥയെഴുതി വിജി തമ്പി സംവിധാനം ചെയ്ത സത്യമേവ ജയതേ(2000)യിലെ കള്ളന്റെ വേഷത്തിലൂടെയാണ് സലീം റാഫി മെക്കാര്‍ട്ടിന്മാരുടെ ശ്രദ്ധയിലെത്തുന്നത്. അവരുടെ സൂപ്പര്‍ ഹിറ്റ് ചിത്രമായ തെങ്കാശിപ്പട്ടണത്തി(2000)ലെ വേഷം അക്ഷരാര്‍ത്ഥത്തില്‍ വഴിത്തിരിവായി. അതോടെ സലിം കുമാറിന്റെ ഹാസ്യകഥാപാത്രങ്ങള്‍ മലയാള സിനിമയില്‍ രാശിയായി. മായാവിയിലെ കണ്ണന്‍സ്രാങ്ക്, കല്യാണരാമനിലെ പ്യാരിലാല്‍, പുലിവാല്‍ കല്യാണത്തിലെ മണവാളന്‍, മീശമാധവനിലെ വക്കീല്‍ മുകുന്ദനുണ്ണി, ചതിക്കാത്ത ചന്തുവിലെ ഡാന്‍സ് മാസ്റ്റര്‍ വിക്രംസി ഐ ഡി മൂസയിലെ ഭ്രാന്തന്‍...ഒന്നിനു പിറകെ ഒന്നായി സലീമിന്റെ ഹിറ്റ് കഥാപാത്രങ്ങള്‍. അവയിലധികവും മലയാള സിനിമയിലെ ഹാസ്യവേഷങ്ങളില്‍ കള്‍ട്ട് തന്നെയായിമാറി. 

എന്നാല്‍ 2005ല്‍ ലാല്‍ ജോസ് സംവിധാനം ചെയ്ത 'അച്ഛനുറങ്ങാത്ത വീട്' പുറത്തുവന്നതോടെ സലീമിനെ ഇഷ്ടപ്പെട്ടവരും അല്ലാത്തവരും ഒരുപോലെ ഞെട്ടി. സലീംകുമാറിലെ അഭിനേതാവിന്റെ അന്നോളം കാണാത്തൊരു മറുമുഖമാണ് സാമുവല്‍ പ്രഭാകരന്‍ എന്ന കേന്ദ്ര കഥാപാത്രം വെളിപ്പെടുത്തിയത്. സമൂഹം വേട്ടയാടുന്ന പീഡിപ്പിക്കട്ട പെണ്‍കുട്ടിയുടെ പിതാവിന്റെ ആത്മസംഘര്‍ഷം അനനുകരണീയവും അന്യാദൃശവുമായ ശൈലിയിലാണ് സലീംകുമാര്‍ ആവിഷ്‌കരിച്ചത്. മികച്ച രണ്ടാമത്തെ നടനുള്ള സംസ്ഥാന അവാര്‍ഡും ആ വര്‍ഷം സലീം കുമാറിനു ലഭിച്ചു. രഞ്ജിതിന്റെ നേതൃത്വത്തില്‍ പുറത്തിറങ്ങിയ കേരളകഫേ(2009)എന്ന ചലച്ചിത്രസമാഹാരത്തില്‍ ഉണ്ണി ആര്‍ എഴുതി അന്‍വര്‍ റഷീദ് സംവിധാനം ചെയ്ത ബ്രിഡ്ജ് എന്ന ഹ്രസ്വചിത്രത്തിലെ അമ്മയെ നടതള്ളുന്ന മകന്റെ വേഷം മുതല്‍ ക്വീന്‍ എന്ന ചിത്രത്തില്‍ പീഡിതയ്ക്കുവേണ്ടി വാദിക്കുന്ന വിചിത്രമനസ്‌കനായ അഭിഭാഷകന്‍ വരെ ഒരു പിടി മികച്ച വേഷങ്ങള്‍ സലീമിനെ തേടിയെത്തി. മകനുപേക്ഷിച്ചു പോയ വൃദ്ധ ദമ്പതികളുടെ ഹജ്ജ് ശ്രമങ്ങളുടെ കഥപറഞ്ഞ സലിം അഹമ്മദിന്റെ 'ആദാമിന്റെ മകന്‍ അബു'(2010) എന്ന ചിത്രത്തിലെ വയോധികനായ അബുവായുളള അദ്ഭുതാവഹമായ വേഷപ്പകര്‍ച്ചയിലൂടെ മികച്ച നടനുള്ള ദേശീയപുരസ്‌കാരവും സംസ്ഥാന പുരസ്‌കാരവും കേരള ഫിലിം ക്രിട്ടിക്‌സ് പുരസ്‌കാരവും നേടി. 

മാട്ടുപ്പെട്ടി മച്ചാന്‍, പട്ടാഭിഷേകം, നാടന്‍ പെണ്ണും നാട്ടുപ്രമാണിയും, കുഞ്ഞിക്കൂനന്‍, തിളക്കം, കിളിച്ചുണ്ടന്‍ മാമ്പഴം, പട്ടാളം, തൊമ്മനും മക്കളും, രാപ്പകല്‍, രാജമാണിക്യം, ചാന്തുപൊട്ട്, കറുത്ത പക്ഷികള്‍, അണ്ണന്‍ തമ്പി, ചട്ടമ്പിനാട്, ബെസ്റ്റ് ആക്ടര്‍, മേരിക്കുണ്ടൊരു കുഞ്ഞാട്, ഉദയനാണ് താരം, കുഞ്ഞനന്തന്റെ കട, അറബിക്കഥ, പത്തേമാരി, വെളിപാടിന്റെ പുസ്തകം, ഡ്രൈവിങ് ലൈസന്‍സ്, തല്ലുമാല തുടങ്ങി നാന്നൂറോളം ചിത്രങ്ങളില്‍ വേഷമിട്ടു. ഇവയില്‍ ഉദയനാണ് താരം, കുഞ്ഞനന്തന്റെ കട, അയാളും ഞാനും തമ്മില്‍, പെരുമഴക്കാലം, ഗ്രാമഫോണ്‍ തുടങ്ങിയചിത്രങ്ങളിലെ കഥാപാത്രങ്ങള്‍  സലീമിന്റെ നടനനൈപുണ്യം വിളിച്ചോതുന്നവയായി. 'കൂടോത്രം' ആണ് അവസാന ചിത്രം. ലാല്‍ ജോസിന്റെ അയാളും ഞാനും തമ്മില്‍(2012) എന്ന ചിത്രത്തിലെ തൊമ്മാച്ചന്‍ എന്ന കഥാപാത്രത്തിന് മികച്ച ഹാസ്യനടനുള്ള സംസ്ഥാന പുരസ്‌കാരവും സലീം സംവിധാനം ചെയ്ത് ജയ്ഹിന്ദ് ടിവി സംപ്രേഷണം ചെയ്ത പരേതന്റെ പരിഭവങ്ങള്‍ എന്ന ടെലിഫിലിമിലെ പ്രധാനവേഷത്തിന് മികച്ച നടനുള്ള 2013ലെ സംസ്ഥാന ടെലിവിഷന്‍ പുരസ്‌കാരവും ലഭിച്ചു. 

ഭിന്നശേഷിക്കാരായ രണ്ടുപേരുടെ ജീവിതത്തിന്റെ പശ്ചാത്തലത്തില്‍ കേരളസമൂഹത്തിന്റെ വൈവിധ്യവും മനുഷ്യമനസുകളുടെ വൈരുദ്ധ്യവും അവതരിപ്പിച്ച കമ്പാര്‍ട്ട്‌മെന്റ്എന്ന ചിത്രത്തിലൂടെയാണ് 2015ല്‍ സലീംകുമാര്‍ രചയിതാവും സംവിധായകനുമായി മാറുന്നത്. എന്നാല്‍ കേരള രാജ്യാന്തര ചലച്ചിത്രമേളയില്‍ മലയാള സിനിമാവിഭാഗത്തില്‍ ഏറെ ശ്രദ്ധിക്കപ്പെട്ട കറുത്ത ജൂതന്‍ (2017) ആണ് സംവിധായകനെന്ന നിലയില്‍ സലിം കുമാറിനെ സിനിമാചരിത്രത്തില്‍ അടയാളപ്പെടുത്തുന്നത്. കേരളത്തിലെ അന്യവല്‍ക്കരിക്കപ്പെട്ട ജൂതസമൂഹത്തിന്റെ ജീവിതത്തിലൂടെ ന്യൂനപക്ഷസമൂഹങ്ങളുടെ ഓര്‍മ്മകള്‍ ചരിത്രത്തില്‍ രേഖപ്പെടാതെ പോകുന്നതെങ്ങനെ എന്നദ്ദേഹം വ്യക്തമാക്കി. ആരോണ്‍ ഇല്യാഹുവായി സലീം കുമാര്‍ തന്നെയാണ് വേഷമിട്ടത്.  ഈ ചിത്രത്തിന്റെ കഥയ്ക്ക് സംസ്ഥാന ചലച്ചിത്ര പുരസ്‌കാരം ലഭിച്ചു. പിന്നീട് 2018ല്‍ സംവിധാനം ചെയ്ത ദൈവമേ കൈതൊഴാം കെ. കുമാറാകണം മികച്ച സറ്റയറായിരുന്നെങ്കിലും അര്‍ഹിക്കുന്ന വിജയം നേടിയില്ല.

കലാകാരന്റെ നിഷ്പക്ഷത എന്ന നാട്യത്തോട് പുച്ഛമായിരുന്നു സലീം കുമാറിന്. പഠിക്കുമ്പോള്‍ കെ എസ് യു കാരനായിരുന്ന സലീം താന്‍ ജനിച്ചതേ കോണ്‍ഗ്രസുകാരനായിട്ടാണ് എന്നാണ് സ്വയം വിശേഷിപ്പിച്ചത്. ആറുവയസുമുതല്‍ കോണ്‍ഗ്രസ് ചടങ്ങുകളില്‍ പങ്കെടുത്തിട്ടുള്ള സലീം തെരഞ്ഞെടുപ്പുകളില്‍ കോണ്‍ഗ്രസ് സ്ഥാനാര്‍ത്ഥികള്‍ക്കായി വോട്ടുതേടാന്‍ മടിച്ചില്ല. കോണ്‍ഗ്രസിനു വേണ്ടി ഒരു പക്ഷേ ആദ്യവും അവസാനവുമായി ഒരാള്‍ തെരുവുനാടകം സംഘടിപ്പിച്ചിട്ടുണ്ടെങ്കില്‍ അതു താനായിരിക്കുമെന്ന് അഭിമാനത്തോടെ പറഞ്ഞിട്ടുണ്ടദ്ദേഹം. ആര്‍ക്കുമുന്നിലും തന്റെ സ്വത്വമോ സ്വാതന്ത്ര്യമോ പണയം വയ്ക്കാന്‍ സന്നദ്ധനല്ലായിരുന്ന സലീം സ്വന്തം അമ്മയുടെ സ്‌നേഹവാത്സല്യങ്ങള്‍ക്കു മുന്നില്‍ മാത്രം പത്തിമടക്കി. അമ്മയായിരുന്നു അദ്ദേഹത്തിന്റെ ദൗര്‍ബല്യം. ചന്തു, ആരോമല്‍ എന്നീ മക്കളില്‍ ചന്തു അടുത്തിടെ മഞ്ഞുമ്മല്‍ ബോയ്‌സ്, ലോകാ ചാപ്റ്റര്‍ വണ്‍ ചന്ദ്ര തുടങ്ങിയ ചിത്രങ്ങളിലൂടെ ഏറെ ശ്രദ്ധേയനായി തിളങ്ങിയ യുവനടനാണ്. ഭാര്യയ്ക്കും രണ്ടാണ്‍മക്കള്‍ക്കുമൊപ്പം ജീവിക്കുമ്പോഴും രോഗം അലട്ടുമ്പോഴും വിധിയെ പഴിക്കാതെ അവയെയെല്ലാം തൃണവല്‍ക്കരിച്ച് പൊതുമണ്ഡലത്തില്‍ സജീവവും കര്‍മ്മനിരതവുമായി നില്‍ക്കാന്‍ അദ്ദേഹം ശ്രമിച്ചു.മരണാനന്തരം തനിക്ക് മതപരമായ ആചാരങ്ങളൊന്നുമുണ്ടാവരുത് എന്നു കുടുംബാംഗങ്ങളോട് നിഷ്‌കര്‍ഷിച്ചതില്‍പ്പോലും പ്രതിബദ്ധതയുള്ളൊരു മനുഷ്യന്റെ തളരാത്ത ഇച്ഛാശക്തി കാണാം.

മണ്ണില്‍ ചവിട്ടി നിന്ന മനുഷ്യനെന്നതിലുപരി മണ്ണിനെ സ്‌നേഹിച്ച മികച്ചൊരു കര്‍ഷകനായിരുന്നു സലീംകുമാര്‍. പോക്കാളികൃഷിയടക്കം കൃഷിയെ അദ്ദേഹം തികഞ്ഞ അവധാനതയോടെയാണ് സമീപിച്ചത്.കൃഷിക്കാരനാവാന്‍ എല്ലാവര്‍ക്കും സാധിക്കില്ലെന്നുറച്ചു വിശ്വസിക്കുകയും ചെയ്തു അദ്ദേഹം. കൃഷിയെ ഫാഷനായല്ല, ആവശ്യമായാണ് അദ്ദേഹം കണ്ടത്.പോക്കാളി കൃഷിയെപ്പറ്റി ഒരു ഹ്രസ്വചിത്രവും സംവിധാനം ചെയ്തിട്ടുണ്ട്.

സ്വന്തം വാക്കോ പ്രവര്‍ത്തിയോ മറ്റൊരാള്‍ക്ക് അപമാനമാവരുത് എന്ന കരുതലുണ്ടായിരുന്നു അദ്ദേഹത്തിന്. ആത്മവേദനകളെ സ്വതസിദ്ധമായ തമാശയില്‍ പൊതിഞ്ഞ് അതിശയോക്തിപരമായി അവതരിപ്പിച്ചിരുന്ന അദ്ദേഹം സ്വന്തം കണ്ണീര് മറ്റുള്ളവര്‍ കാണാതെ നോക്കി. ഈശ്വരാ വഴക്കില്ലല്ലോ എന്ന ആത്മകഥാക്കുറിപ്പുകളെ അദ്ദേഹം വിശേഷിപ്പിക്കുന്നത് നോക്കുക: 'വിനോദയാത്ര കഴിഞ്ഞു തിരിച്ചെത്തിയ പ്രിയപ്പെട്ടവരുടെ യാത്രാ വിവരണം പോലെ ജനനമെന്ന സ്റ്റാര്‍ട്ടിങ് പോയിന്റില്‍ നിന്ന് മരണം എന്ന ഫിനിഷിങ് പോയിന്റിലേക്കു നടത്തുന്ന യാത്ര. ഇതിനിടെ കണ്ടുമുട്ടിയ കഥാപാത്രങ്ങള്‍. അനുഭവങ്ങള്‍.' 

ആരോ എഴുതിയ സ്‌ക്രിപ്റ്റാണ് ജീവിതം എന്നു വിശ്വസിച്ച മനുഷ്യനായിരുന്നു സലീംകുമാര്‍. എത്ര വലിപ്പത്തിലേക്കുയര്‍ന്നാലും ഒരു ഐ.സി.യുവില്‍ തീരാവുന്നതേയുള്ളൂ ജീവിതം എന്നായിരുന്നു സലീമിന്റെ ജീവിതാവബോധം. ഇക്കഴിഞ്ഞ ജൂണ്‍ ആറിന് രാത്രി കൊച്ചിയിലെ ആശുപത്രി ഐ സി യൂവില്‍ 56-ാം വയസില്‍ ആ ജീവിതം പൊലിയുമ്പോള്‍ നിശ്ചയമായും അത് അകാലത്തിലുള്ളതാണെന്നതില്‍ തര്‍ക്കമില്ല. സലീമില്‍ നിന്ന് പ്രേക്ഷകന് ഇനിയും മികച്ചത് കിട്ടേണ്ടതായിരുന്നു. കേരളത്തില്‍ നിന്ന് സലീമിനും.